رن تليفون ولاء كان فؤاد المتصل , حست بسعادة لم تعرف مصدرها
ولاء :- ألو
فؤاد :- ألو , ولاء أنا فؤاد أخو لمياء فكرانى ؟
ولاء :- أكيد فكراك ,هو أنت تتنسى , قصدى يعنى قعدتك متتنسيش
فؤاد مبتسما :- شكرا , إنتى بس جيتى فى بالى قولت أطمن عليكى , أخبارك إيه ؟
ولاء :- أنا بخير الحمد لله , وإنت أخبارك إيه ؟
فؤاد :- أنا بخير الحمد لله .
ولاء :- إيه فينك ؟
فؤاد :- موجود
ولاء :- ههههه أنا قصدى دلوقت
فؤاد :- أه هههه أنا فى شارع ........... قدام مطعم ........ كنت داخل أكل سندوتشين على السريع
ولاء :- معقول , دا أنت قريب مننا أوى
فؤاد :- ليه هو أنتوا ساكنين هنا ؟
ولاء :- لأ , أنا فى كافيتيريا ........ أنا وأصحابى بنلعب بلياردوا ما تيجى تقعد معانا.
فؤاد :- مش هضايقكم ؟
ولاء :- إنت بتهزر , دا أنت هتشرفنا يامعلم ,يلا مستنينك
فؤاد :- خلاص هاكل وأجى على طول
ولاء :- تاكل دا إيه ,تعالى الكافيه هنا بيقدم كل حاجة حتى السنوتشات تعالى ومالكش دعوة
فؤاد :- خلاص مسافة السكة وأكون عندك
ولاء :- أوك فى إنتظارك .
قفل فؤاد التليفون وغير طريقه علشان يروحلها طول يومين وهو بيقاوم رغبة الإتصال بيها يومين كاملين مبطلش تفكير فيها , مهواش عارف ليه بيفكر فيها مع إنها غير كل البنات لكن هى الوحيدة اللى لفتت نظره وعجبته .
أما ولاء ففؤاد هو الراجل الوحيد اللى لمس قلبها وخلاه يدق ومن أول مرة وبرضك مش عارفة دا حصل إزاى ولا ليه لكنه حصل .
*************************
وصل فؤاد للمكان وشافها كانت مع تلت شبان حس بإحساس غريب لكنه زال بسرعة بعد ماعرفته عليهم كانوا هيلعبوا جيم بلياردوا جديد
ولاء :- خد إلعب مكانى هجيب حاجة على السريع
فؤاد :- أوك
محمود :- إكسر يابرنس
فؤاد :- أوك
بعد عشر دقايق ترجع ولاء إيه يا شباب
محمود :- إيه ده ؟ دا من ساعة ما مسك العصاية مسبهاش كإنه بيلعب لوحده
ولاء :- مستحيل إنت دخلت كل الكور ؟؟؟
فؤاد :- لسة هدخل البلاك ( يدخلها ) يس كسبت
ولاء :- واضح إنك حريف
فؤاد :- دى لعبتى المفضلة
ولاء : طاب يلا الأكل وصل
يبص على الجرسون اللى جه بالأكل والعصير
فؤاد :- بس أنا ماطلبتش حاجة لسة
ولاء :- لأ دا على حسابى
فؤاد :- وأنا مش هسمح بحاجة زى دى
ولاء :- دى هدية منى ليك والنبى قبل الهدية
فؤاد :- أوك بس دى أول وأخر مرة
ولاء :- إتفقنا
بعد شوية كانت ولاء خسرت فى البلياردو
فؤاد :- إنتى بتلعبى غلط
ولاء :- أنا مش حريف بس بحاول أتعلم
فؤاد :- أولا إسمها مش حريفة ... ثانيا تحبى أعلمك ؟؟؟
ولاء :- بجد ؟؟ يعنى إنت ممكن تعلمنى ؟؟
فؤاد :- ممكن بس ليا شروط
ولاء :- إيه هى ؟
فؤاد :- لأ تقوليلى إنك موافقة الأول
ولاء :- أوافق على حاجة معرفهاش
فؤاد :- متقلقيش مهياش حاجة غلط لا سمح الله .... وتقدرى بسهولة بعد كده ترجعى فى كلامك لو لاقيتيها وحشة
ولاء :- أوك موافق
فؤاد :- أول شرط تتكلمى بصيغة المؤنث يعنى تقولى موافقة ..ثانيا تعلمينى ركوب الموتوسيكل أوك
ولاء :- ركوب الموتوسيكل ساهل لكن ..
فؤاد :- لأ مفيش لكن
ولاء :- أوك إتفقنا تعالى بقى علمنى
فؤاد :- أوك
بعد نص ساعة وعلى بعد منهم يجلس أصدقاء ولاء
محمود :- عمرى ماشفت ولاء سعيدة كده وبتضحك بالشكل ده ولا شفت عينيها بتلمع كده غريبة
عمر :- إيه الغريب فى كده إنت ناسى إنها فى النهاية بنت ... شكلها كده طبت يامعلم
جلال :- مين دى اللى تطب ؟؟؟ ولاء مستحيل تحب ومستحيل تتحب دى ولد
محمود :- يمكن بتتصرف كولد لكنها فى النهاية فعلا بنت سواء رضينا أو رفضنا ومش زى أى بنت دى تتحب بسهولة للى يعرفها
جلال :- حودة إيه الحكاية ؟؟؟أوعى تكون واقع فيها ؟؟؟
محمود :- من زماااااان بس المشكلة إنها عمرها ماخدت بالها منى ... ربنا يسعدها.
**********************************
ولاء :- يااااااااااااه دى الساعة 10.5 الوقت بيجرى بسرعة أوى
فؤاد :- يلا نروح
ولاء :- يلا
فى الشارع
ولاء :- مش هتلاقى تاكسيات دلوقت تحب أوصلك ؟
فؤاد :- هههه وهتوصلينى إزاى بقى إن شاء الله ؟؟
ولاء :- عادى تركب ورايا الموتوسيكل وأوصلك
فؤاد بإندهاش :- نعم ؟؟؟؟؟؟؟ أركب وراكى ؟؟ دا الناقص كمان
ولاء :- فيها إيه يعنى ..الموتوسيكل كبير يعنى متقلقش وكمان إن عارف إن التاكسيات عددها قليل هنا
فؤاد :- ماشى بس بشرط ؟
ولاء :- إيه تانى ؟؟؟
فؤاد :- أعزمك على آيس كريم
ولاء مبستمة :- أوك
يركب ورائها ويمسك بيده جيدا من الخلف تاركا بينهما مسافة حتى يصلوا لأحد محلات الآيس كريم يحضر لهما آيس كريم شيكولاته
فؤاد :- عارفة إنتى شبه إيه ؟؟
ولاء :- إيه ؟؟
فؤاد :- شبه شيتا
ولاء مصدومة وبحزن :- شيتا ؟؟ بقى كده وأنا اللى فكرت إننا أصحاب ؟؟؟
فؤاد ضاحكا :- معقول طالبة جامعية وزعلانة لما بقول إنك شبه شيتا ؟؟
ولاء :- لإنها شتيمة
فؤاد :- الناس هما اللى خلوها شتيمة .. إنتى عارفة إن فى كلمات كتيرة معناها جميل جدا ورغم كده الناس بتعتبرها كلمات قمة فى السوقية ؟؟ عموما ياست البنات شيتا هى أنثى الفهد وهى أكتر حيوان مفضل عندى
ولاء :- أديك قولت حيوان
فؤاد :- ياسلام يا أختى ما أنتوا بتقولوا على الراجل سبعى وجملى وهما دول يعنى مش حيوانات ؟؟؟
ولاء :- حيوانات لكن .. يعنى هما أكيد قاصدين قوة الأسد وصبر الجمل
فؤاد :- بس فى النهاية حيوانات عموما فعلا المقصود صفاتهم وأنا كمان أقصد شجاعة شيتا وسرعنها ورشاقتها كده يعنى
ولاء :- طاب ليه مشبهتنيش بالأسد ؟؟
فؤاد غاضبا :- لإنك بنت مش ولد وكمان أنا بحب الفهود أكتر من الإسود
ولاء :- مع إنهم عيلة واحد؟؟
فؤاد :- خلاص ياشيتا سيبك من عالم الحيوان ده ويلا نروح
ولاء :- ماشى يا أسد
فؤاد :- أسد؟؟؟
ولاء :- أه ....أشمعنى أنا أبقى شيتا يعنى ؟؟
فؤاد :- خلاص أسد أسد ...يلا بينا
ولاء :- يلا بينا
يصل فؤاد لمنزله ويودع صديقته الجديدة
يدخل فؤاد لغرفته ويفتح اللاب الخاص به وينظر لخلفية الشاشة التى تحمل صورة شيتا حيوانه المفضل على الإطلاق والتى تجد صورتها فى كل شبر من حائط غرفته وتذكر شقيقته عندما قالت له من سنوات " أشعر بأنك ستتزوج شيتا من شدة عشقك لها " إبتسم فؤاد لنفسه عندما تذكر رده على شقيقته " لن أتزوج بإمرأة إلا إذا شعرت أنها تشبه شيتا "
بسنت سالم
