الأم :- يابنات يابنات إنتى يا بت إنتى وهى إنتوا فين ؟؟؟
زيزي :- نعمين يا ست الكل
ولاء :- تحت أمرك ياحاجة
الأم :- أشتريت ليكم شوية حاجات روعة علسان جهازكم , وكمان ياست ولاء أشتريتلك حاجة تلبسيها بدل القرف اللى إنتى لابساه ده
ولاء وهى بتبص على هدومها :- مالها هدومى بقى إن شاء الله ماهى زى الفل أهى ولا أنا لازم ألبس محزق وملزق علشان يبقى حلو
الأم :- يابت بطلى لماضة , إنتى كبرتى وبقيتى عروسة , ومتقلقيش أنا علشان عارفة إنك غاوية بنطلونات جبتلك حاجات تليق عليها , أتفرجى وشوفى الحلاوة
الأم تديها بادى خروج فوشيا وواحد بمبى
ولاء:- إيه ده ودا لمين إن شاء الله ؟ أكيد الحاجات دى لزيزى مش ليا هى اللى بتلبس الحاجات الغريبة دى .
الأم :- لأ دول ليكى وكمان علشان لما تروحى الشبكة النهاردة تبقى زى بقيت البنات يمكن ربنا ينفخ فى صورتك ويجيلك عريس ولا حاجة
ولاء :- شبكة إيه وعريس لمين ؟ أنا مش بروح الحاجات الغريبة بتاعتكم دى وكمان أنا مش ناوية أتجوز ريحى بالك إهتمى إنتى بس بهدوم زيزى وشوارها خلاص . أنا متأكد إنها هتتجوز بمجرد ماتخلص كلة
الأم :- أنا هعلم فيكى لحد إمتى , يابنتى حرام عليكى هتشلينى , إرحمينى بقى , فى بنت فى الدنيا تقول أنا متأكد أسمها متأكدة إفهمى بقى
تضحك زيزى :- ياماما ما إنتى عارفة ولاء وتفكيرها
الأم :- تفكيرها غلط والنهاردة بقى بالذات لازم تلبس زى بقية البنات
ولاء :- إشمعنى بقى النهاردة بالذات ؟؟
الأم :- علشان إنتى رايحة شبكة لمياء صاحبة زيزى , يمكن واحدة تشوفك وتعجبيها بشعرك المنيل ده وتخطبك لإبنها , متنسيش إن دى أخر سنة ليكى فى الكلية عايزاها تخلص وأجوزك وأفضى لأختك بقى
ولاء :- طاب لمياء صاحبة زيزى أروح أنا أنيل إيه ؟
الأم :- ماينفعش أختك تروح لوحدها وبدل ما نبعت معاها راجل أهو إنتى تروحى معاها وتخلى بالك منها
ولاء :- بس يا حاجة إنتى عارفة إنى مش بحب أروح لا أفراح ولا مناسبات ولا كلام من ده
يدخل الأب والشقيقان
الأب :- ليه بقى إن شاء الله هو إنتى مش زى بقية البنات
يضحك الجميع
الأب :- بقول إيه إتعلقتى بلبس البنطلونات ولبس الولاد وسكتنا , حلقتى راسك قرعة وسكتنا كم
ولاء مقاطعة والدها :- قرعة إيه يا حاج إنت فى سوق الخضار , دى قصة البنات كانوا بيقصوها زمان إسمها جرسون يعنى اللى بيقدم الشاى فى القهوة " تبتسم لنكتتها " سورى ياحاج جرسون يعنى ولد يعنى قصة كده شبه بتوع الولاد
الأب :- القصة اللى بتقولى عليها يافالحة كانت أطول من كده دلوقتى بقى أختك مش هتروح لوحدها وإنتى هتروحى معاها ورجلك فوق رقبتك
ولاء :- ياحاج مش بحب أروح الأماكن دى بكون قاعد مخنوق فى وسط الحريم
الجميع فى صوت واحد :- مخنوقة اسمها مخنوقة
ولاء :- طيب أنا رايح الشغل ولما أرجع يبقى يحلها ربنا
الأم :- متتأخريش علشان تروحوا وتيجوا بدرى
*********************************
تصل ولاء المنزل فى السابعة والنصف مساءا
الأم :- إتأخرتى ليه ياهانم؟؟؟
ولاء :- لسة مخلص شغل
الأم :- طاب يلا على الحمام وبسرعة علشان تروحوا على الشبكة
ولاء :- هى زيزى لسة ماراحتش ؟؟ طاب دى كده إتأخرت ومش هينفع تروح
الأم :- لأ لسة بدرى . إخلصى بسرعة
ولاء :- طاب مش هاكل أنا على لحم بطنى من الصبح ؟؟
الأم :- لأ لما تيجوا هنتعشى كلنا
ولاء :- والله العظيم دا حرام يعنى خروجة غصب وكمان من غير أكل إيه الظلم اللى أنا فيه ده.
***************************************
فى منزل لمياء تجلس العروس والعريس بجانب بعضهما أما زيزى فمظبطة الشبكة على واحدة ونص وولاء قاعدة مخنوقة بعد مادبت خناقة تانية مع مامتها قبل ماتخرج علشان اللبس ومن كتر خنقتها تقوم وتاخد إيد أختها علشان يمشوا لكن لمياء تحوشهم
لمياء :- هو ايه ده أنتوا لسة جايين
ولاء :- معلش أهى جات وعملت الواجب
زيزى :- لأ بقى ماما قايلة ساعتين إحنا مكملناش نص ساعة حتى
ولاء :- يووووه
يوصل أخو العروسة ويشوف التلاتة مع بعض
فؤاد :- فى إيه ؟
لمياء :- أعرفك يافؤاد دى ولاء أخت زيزى
فؤاد ينظر إليها بتمعن :- أهلا ولاء
ولاء : أهلا يا أستاذ فؤاد
فؤاد :- إزيك يازيزى
زيزى بحياء :- أهلا يا فؤاد
فؤاد :- فيه ايه
لمياء :- ملحقوش يقعدوا وولاء عايزة تاخد زيزى وتمشى
فؤاد :- ليه كده يا ولاء
ولاء :- معلش إتخنقت
فؤاد :- أنا عارف اللى خنقك ممكن تيجى نقعد فى البلكونة بعيد عن الدوشة والزحمة وخليهم يفرحوا شوية
ولاء :- مش هينفع الحاج والحاجة قايلنلى ماسيبهاش ولو عرفوا هندبح
زيزى :- ماتقلقيش مش هقولهم
فؤاد :- يلا بينا بعيد عنهم
****************************
فى البلكونة
فؤاد :- إن جيتى للحق كنت هتخانق معاكى
ولاء :- ليه ؟؟؟
فؤاد :- بصراحة فى الأول فكرتك ولد يعنى بسبب لبسك وكده
ولاء :- عادى كله بيفكر كده
فؤاد :- طاب ليه كده يعنى اللبس والشعر وحتى طريقة الكلام ؟؟
ولاء :- عادى زيزى هى الصغيرة اللى من سنى ولاد أتربيت معاهم وتقدر تقول كده شربت منهم كل حاجة
فؤاد :- ههههههههههه أه علشان كده , سيجارة
ولاء :- ماشى
يدخنان سويا ويتبادلان الأحاديث الشيقة
ولاء :- ياااه إحنا إتأخرنا لازم أمشى
فؤاد :- لسة بدرى
ولاء :- معلش عندى شغل الصبح
فؤاد :- ممكن أخد رقم تليفونك يعنى إحنا مش بقينا أصحاب
ولاء :- أكيد طبعا
تعطيه رقم هاتفها وتذهب وبعد شوية يشوفها بتركب موتوسيكل وزيزى وراها فأبتسم
.jpg)
ليست هناك تعليقات:
إرسال تعليق