لعبة المظاهرات

النهاردة وكالعادة قاعدة فى البيت مش لاقية حاجة أعملها ومفيش حاجة الواحد يتفرج عليها وعيال الشارع عاملين ليا صداع بصوتهم العالى وهما طبعا فرحانيين علشان الأجازة مش عايزة تخلص المهم كانوا عمالين يتخانقوا يلعبوا إيه ؟؟؟ سؤال غريب الألعاب طول عمرها معروفة على الأقل بالنسبة لينا لكن جيل الإنترنت جيل مختلف عن جيلنا إختلاف كامل وقفت فى الشباك أتفرج عليهم وفى الأخر شوفت عيل طوله شبر ونص بيقولهم تعالوا نلعب لعبة الإخوان والبوليس ^_^ وكل الأطفال فعلا وافقوا نلعب لعبة الإخوان والبوليس .... طيب مين فيكم هيقوم بدور الإخوان ؟؟؟؟؟ الغريب إن ولا واحد من العيال وافق إنه يقوم بدور الإخوان حتى عيل منهم معروف إن هو وعيلته إخوان رفض ولما واحد سأله إنت مش عايز تبقى إخوان ليه إذا كان إنت أصلا إخوان؟؟؟؟؟ قالوا لإنكم هتبقوا البوليس وكلكم هتضربونى ضحك العيال كلهم وأنا ضحكت معاهم فرد عيل تانى بلاش اللعبة دى تعالوا نلعب لعبة أحلى ... فسألوه لعبة إيه؟؟؟؟

قالهم لعبة المظاهرات...... بصراحة الكلمة صدمتنى فناديت عليه وفتحتله الباب وسألته .. إيه لعبة المظاهرات دى ؟؟؟ قالى هو مش الكبار كل مايكونوا زهقانيين ومضايقين ومخنوقيين ومش لاقين حاجة يعملوها يعملوا مظاهرات ؟؟؟؟ إشمعنى هما بقى؟؟؟

بصراحة كلامه كان غريب بالنسبة ليا مش مهم سمعه منين الأكيد مش من أهله لأنى عارفة أهله كويس ناس غلابة لا ليهم فى الطور ولا فى الطحين ..... لكن كلامه كان فى الصميم لإننا فعلا بقينا فى مجتمع بيلعب لعبة المظاهرات .