كان يا ماكان

كان يا مكان فى سالف العصر والأوان كان فيه بلد كل اللى فيها اسرة واحدة بيحبوا بعض ويخافوا على بعض .
أسرة واحدة تضمنا فى جرحنا وفرحنا, نحزن سوا نفرح سوا ولا أى شئ يهمنا .
آآآآآآآآآآآآآه لو صرخ فيها الولد ألف واحد يلحقه ويطمنه , إحنا سوا .
آآآآآآآآآآآآه لو إتعرت بنتنا ألف إيد تتمد لها لسترها , وتقولها متخافيش إحنا سوا .
كان يا مكان من زمن فى سالف العصر اللى إنتهى بيت صغير , أسرة صغيرة .
ناس وناس متجمعين على المحبة والمودة والهنا .
كان يا مكان فى سالف العصر اللى إنتهى وإختفى ,
كانت كرامة الإنسان أهم كتير من الإنسان  .
كان الشقا عنوان .................. الشرف .
كانت الحياة ترف .
فيه مافيش ميهمنيش كله رضا .
كانت محبة البشر , كل البشر لكل البشر .
ومتسألنيش عن الحقد .
كان زمان فى سالف العصر اللى إنقضى , يرمى السلام شخص معدى على إنسان .
ميسألوش إنت مين او اسمك إيه او دينك إيه .
المهم إنك إنت ابن بلدى ودا المهم .
كان زمان
ماتش كورة شئ جميل .
والكل بيه مبسوط سعيد .
ومافيش قتيل ولا عداوة بين شخصين ولا تار بايت بين عيلتين .
مش لشئ أكتر من إن كل واحد وله فريق .
كان زمان فى سالف العصر والأوان اللى إنقضى .
وياريته يوم ما أنقضى .

بسنت سالم